Абдуллаланы Умар, Къызыл Октябрь элни орта школуну директору болуб къалмай, элде миллет тутушдан да тренерди.
Карачаевск шахарда педагогика институтну бошагьандан сора Къызыл Октябрь элни орта школунда физкультурадан дерслени бардырыб тургъанды. Институтда окъугьан джылларында миллет, эркин тутуш бла кюрешиб, эришиулеге къошулуб, СССР-ни спортуну устасыны мардасын толтургъан эди.
Бюгюнлюкде уа аны сохталарыны арасында миллет тутушдан дунияны, Европаны, Россияны чемпионлары да бардыла.
Март айны 14-де бла 15-де Украинада миллет тутушдан халкъла арасы эришиуле болгьан эдиле. Ол эришиуле Умар юретген джашчыкъладан тертеулен къошулгъанды. Владимир шахарда да март айны 25-28-де Россияны алчылыгъы ючюн миллет тутушдан эришиуле ётгендиле. Алагъа да Умар юретген гёджебледен экеулен къошулгъанды.
Абдуллай улу былай айтды:
- Мен кесим спортну бир да бек сюеме. Спорт бла кюрешген, саулукълу болгъан бла къалмай, ариу халили да бола-ды. Спортчуланы арасында кесин аман джюрютген бек аз тюбейди. Школда физкультурадан дерелени бардыргьан джылла-рымда миллет тутушдан секция ачхан эдим. Кёб сабий джюрюб башлагъан эди. Ал джыллада керекли спорт инвентарла джетишмегенлери амалтын инджилир ючюн къалмай эдик. Энди хар затыбыз джетишеди.
Миллет тутушдан кёб спортну устасын хазырлагъанма.Аланы барысыны да тизимин айтыб чыкъгъан къыйынды. Дунияны, Европаны, Россияны чемпионларыны тизимин айтыб чыгъаргъа боллукъма. Сез ючюн, абадан къауумланы просында Шидакъланы Аныуар, Чомаланы Мухтар, кеслерини ауурлукъларына кёре, дунияны чемпионлары болгъандыла.
Кипкеланы Мурат а Европаны алчылыгъы ючюн баргъан эришиуледе 2-чи орунну алгъан эди. Абайханланы Ислам да Европада эм кючлю гёджеблени бириди. Кюмюш медалны иесиди. Бу джашлагъа 22-25 джыл толгъанды.
Гитче къауумладан гёджеблерибиз да аланы ызларындан таукел атлайдыла. Бюгюнлюкде Бостанланы Расул, Джанкёз-ланы Будиян, Шаманланы Осман, Эрикгенланы Ринат - 11-чи классны сохталары - онглу гёджебле болгъанларын танытхандыла. Мартны 14-сю бла 15-де Украинада Халкъла арасы эришиуледе Расул, Будиян, Осман 1-чи орунланы алыб, алтын медалла бла саугьаланнгандыла. Ринат а джез медалны иеси болуб къайтханды. Март айны 25-28-де Владимир шахарда Россияны алчылыгъы ючюн эришиуле бардырылдыла. Бу эришиулеге Бостанланы Расул, Джанкёзланы Расул, къошулуб, алтын, кюмюш медалланы алыб къууандыргъандыла. Ол экиси уа 9-чу классны сохталарыдыла.
Кёб турмай Белоруссияда Европаны алчылыгъы ючюн эришиуле боллукъдула да, абадан къауум - Бостанланы Расул, Джанкёзланы Будиян, Шаманланы Осман, Эрикгенланы Ринат - алагъа къошуллукъдула.
Джашланы эришиулеге ашырыб турургъа школну ачхасы джокъду. Къызылоктябрчы джашла Батчаланы Замир, Ёзденланы Джашарбек, Семенланы Ахмат, Кипкеланы Алибек, дагъыда башхала болушханлай турадыла ачха бла. Ол, бу керекди десем, бири да, огъай демейди. Сау болсунла, бу къыйын кёзюуде элчилерине болушханлары ючюн.
- Аллай бир мийик дараджалы спортчуланы хазырлагъанса. Россияны махтаулу тренери этмегенмидиле алкъын сени?
- Огъай. Бюгюн-тамбла деб тургъан болмасала, къагъытларынгы джарашдыр да бер, деб киши айтмагъанды. Не джашырыу, ол зат къалай эсе да, меннге ауур да тиеди. Алай болса да, иш махтаулу тренер деген атны джюрютюуде тюлдю. Иш къаллай спортчуланы хазырлагъанынгдады.
КЪОБАНЛАНЫ Махмут.
Къарачай газет, 2010 дж. апрелни 15.
|
